Aktorja Kaltrina Zeneli ishte personi i parë që publikoi videon e dhunës së ushtruar nga infermieria ndaj një të moshuare në një nga qendrat e kujdesit të të moshuarve në Pejë.
Në emisionin “Opinion”, Zeneli tregoi dhe se si arriti të merrte videon që e publikoi në rrjetet sociale. Aktorja tregoi se videoja i është dërguar në rrjetet sociale nga një person i panjohur që i kishte kërkuar ndihmë se si mund të denonconte një rast dhune.
Pasi ka parë videon e dërguar prej tij, Kaltrina Zeneli tha se vendosi që ta publikonte në rrjetet sociale dhe më pas mediat kanë shkuar në qendrën e kujdesit të të moshuarve.
“Më ka ardhur prej një personi të panjohur më ka shkruar në rrjetet sociale dhe më ka pyetur një dhunë dhe fillimisht nuk më ka treguar se për çfarë bëhej fjalë. I thash thirr policinë. Më tha më gjej një numër, më vonë thash a ka shkuar në polici. E di, më ka dërguar videon, nuk më është dashur më shumë, më është lutur që të mos e tregoj se kush është ai person. Kur e pash jam shtanguar, isha në prova dhe vetëm kam mbetur. E kam marrë videon dhe e kam postuar, pastaj nuk dija unë kujt ti drejtohesha. E publikova në rrjetet sociale dhe etiketova mediat, pastaj kam filluar të thërres kolegët e mi që punojnë në media dhe iu kam kërkuar të marrin masa. Pasi kanë marrë videon kanë shkuar drejt vendit të ngjarjes”,-tha Zeneli.
