Këto janë pamjet e dhunës barbare ndaj avokatit Sokol Mëngjesi mëngjesin e sotëm nga tre persona.
Siç shihet në video, avokati bie në tokë, ndërsa dhunuesit vijojnë ta godasin. Autorët e ngjarjes së rëndë janë Romario Tabaku, Elton Kasaj, Drivald Aliaj dhe Dorian Aliaj.
Ky i fundit u vetëdorëzua pasditen e sotme, ndërsa ka treguar për policinë se sulmi ndaj avokatit ishte i planifikuar.
Aktualisht janë në kërkim Romario Tabaku, Elton Kasaj dhe Drivald Aliaj.
Sipas policisë, Mëngjesi u dhunua për shkak të detyrës.
Mëngjesi ka qenë avokati i një familje që kishte probleme pronësie me trashëgimtarët e tjerë, gjyqi është fituar nga familja që përfaqësohej nga avokati që u dhunua.
Sipas informacioneve kanë qenë në total 8 trashëgimtarë që i përfaqësonte si avokat Sokol Mëngjesi. Njëri nga 8 trashëgimtarët, Dritan Nano nuk ka pranuar zbatojë kontratën pas fitimit të pronës. Në këtë situatë avokati ka kërkuar të respektohet kontrata që kishin lidhur. Vetëm Dritan Nano nuk e ka pranuar.
Avokati ka hapur gjyq ndaj Nanos për mos zbatimin e kontratës që e ka fituar, dhe përmbarimi i ka bllokuar pronën duke mos e lejuar që të shitet.
Në këtë situatë Nano ka angazhuar lidhjet e tij shoqërore duke kërcënuar avokatin që të tërhiqet nga përqindja që duhet të merrte.
Takimi i parë ka qenë përpara një muaji por nuk kanë rënë dakord. Sokol Mëngjesi ka pretenduar se ka një kontratë që duhet ta zbatojë studio ligjore.
