Bordi i studentëve ka bërë një sondazh me 1670 studentë, prej të cilëve 56% janë shprehur se nuk janë vaksinuar.
Sipas studentëve që kanë organizuar këtë pyetësor, 13% e tyre kanë thënë se kanë na plan të vaksinohen. Ndërkohë që shumica e te rinjve preferojnë vaksinën Pfizer.
“Është një nga vaksinat që jep më shumë siguri dhe është e certifikuar. Nuk është më në fazën eksperimentale si vaksinat e tjera. 31% e studentëve është vaksinuar, pjesa tjetër zgjedhin të mos vaksinohen duke qenë se ata gëzojnë shëndet të plotë dhe nuk e ndjejnë për të bërë vaksinim në këtë moment”, është shprehur studentja Paola Ymeti.
Rreth 80% e studentëve janë shprehur kundër vaksinimit të detyruar, ndërkohë që ata kërkojnë lehtësira për kryerjen e tamponit për të gjithë ata që refuzojnë vaksinimin.
“Është kosto shumë e madhe për studentët sepse çdo javë ata duhet të paguajnë 35 Euro për të paguar një tampon. I kërkojmë qeverisë ose ministrisë të na mundësojë që ne ta bëjmë tamponin në shkollë pa paguar aq shumë”, është shprehur Paola.
Po ashtu ata janë shprehur kundër shtyrjes së vitit të ri akademik me një javë pasi u rriten kostot. Nëse do ketë shtyrje të tjera ta paralajmërojnë për protesta.
“Ministria ka pasur mjaft kohë dhe universitetet gjithashtu. Kanë pasur kohë me bollëk për të bërë një hyrje ose fillim të mbarë akademik dhe nuk e shoh si arsye që të ketë një shtyrje, kur shumë mirë mund të fillonim në datën e planifikuar në 11 Tetor”, është shprehur studenti Gevio Tabaku.
74% e studentëve janë shprehur se dëshirojnë që mësimi të bëhet tërësisht në auditor, ndërkohë që vetëm 11% janë shprehur se mësimi duhet të kryhet online. Pjesë e pyetësorit janë bërë të rinj nga të gjitha universitetet, përfshi edhe ato private./TVKlan
