Ministria e Brendshme ka publikuar listën përfundimtare të votuesve për zgjedhjet parlamentare të 25 Prillit. Nga të dhënat e publikuara nga Drejtoria e Përgjithshme e Gjendjes Civile të drejtën e votës e kanë 3,588,869 shqiptarë.
50.5 % e tyre janë votues meshkuj dhe 49.5 % e tyre janë votues femra. Mësohet se për herë të parë drejt kutive të votimit do të shkojnë 107 204 qytetarë në 5199 qendra votimi në rang vendi.
Po ashtu mësohet se janë bllokuar 1 098 qytetarë si shkak ose si rrjedhojë e ligjit të Dekriminalizimit.
Ministria e Brendshme thekson se i gjithë ky proces i hartimit të listës përfundimtare të zgjedhësve është kryer nën mbikëqyrjen e auditëve të Komisionit Qendror të Zgjedhësve. Në çdo etapë të tij, auditët kanë pasur të njëjtin akses që ka Drejtori i Përgjithshëm i Gjendjes Civile në Regjistrin Kombëtar të Gjendjes Civile. Procesi ka kaluar në disa faza pasi më herët janë realizuar 6 ekstrakte të përbërësve zgjedhore.
Më tej në njoftimin e Ministrisë së Brendshme bëhet me dije se çdo qytetar mund ta verifikojë emrin në listën e zgjedhjeve nëpërmjet shërbimit online në portalin “e-albania”. Për çdo pretendim qytetari mund t’u drejtohet zyrave të Gjendjes Civile në bashki dhe njësi administrative, të cilat do të vijojnë të qëndrojnë të hapura nga dita e hënë, deri në ditën e shtunë.
“Lista përfundimtare e zgjedhësve përmbyll kështu procesin e hartimit dhe shpalljes së Listës së Zgjedhësve.”, thuhej në një deklaratë të Ministrisë së Brendshme.
Në fund bëhet thirrje që qytetarët që u kanë skaduar dokuemente biometrike t’u drejtohen zyrave të aplikimit për t’u pajisur me dokumentet përkatëse në mënyrë që më 25 Prill të shprehin vullnetin e tyre përmes votës./Opinion.al
