Grupi Parlamentar “Demokrat” ka paraqitur 4 propozime për ndryshimin e sistemit zgjedhor.
Tre nga sistemet e propozuar kërkojnë ndryshime në Kushtetutë.
Deputeti Ralf Gjoni (Nisma Thurje) dhe deputeti Myslim Murrizi kanë propozuar sistem proporcional kombëtar me një zonë zgjedhore sipas modelit të Kosovës. Tre deputetë kanë propozuar Sistem propocional rajonal, i korrektuar me listë kombëtare. Një opsion tjetër është sistemi mazhoritar, i korrektuar me listë proporcionale kombëtare.
Të tre këto propozime kërkojnë ndryshime në Kushtetutë. Ndërkohë që një propozim i që shihet për herë të parë është ai për sistem proporcional rajonal, me 12 njësi zgjedhore, të grupuara në 4 rajone zgjedhore. Zbatimi i këtij sistemi mund të bëhet edhe pa kërkuar ndryshime në Kushtetutë.
Në relacionin shoqërues, deputetët e grupit parlamentar “Demokrat” thonë se sistemi zgjedhor aktual i miratuar në vitin 2008 nuk arriti rezultatet e parashikuara por në të kundërt ai prodhoi probleme si : Pabarazia e votës, pabarazia në garën zgjedhore, deformimi i vullnetit të zgjedhësve, influenca politike e individëve të lidhur më botën e krimit, cilësia e përfaqësimit në Kuvend dhe Këshilla Bashkiak, kufizimi i të drejtës për të zgjedhur dhe dobësimi i qytetarit, dekurajimi i qytetarit për të marrë pjesë aktivisht në jetën politike të vendit, prishja e raporteve të forcës brenda partisë politike dhe destabiliteti politik, pesha e ulët e grave në Kuvend dhe Këshilla Bashkiak, influenca e interesave të caktuara ekonomike dhe dobësimi i forcës së shtetit.
“Gjykojmë se Kodi Zgjedhor i miratuar me Ligjin Nr. 10019, datë 29.12.2008 nuk ka arritur rezultatet e premtuara 10 vite më parë. Ndërkohë që, në tërësi, ka rezultuar se, sistemi zgjedhor i përfaqësimit proporcional ka avantazhe të mëdha krahasuar me sistemin mazhoritar, në aplikimin e tij me skemën e listave të mbyllura partiake dhe me zona të vogla zgjedhore;
Jo vetëm kaq, por i kombinuar edhe me rrethana të tjera politike dhe sociale në vend, siç është kultura demokratike dhe institucionale brenda subjekteve politike, institucionet e dobëta, apo fuqia e krimit të organizuar, ky model zgjedhor ka krijuar edhe probleme të tjera serioze për zhvillimin e jetës politike të vendit.
Në ndryshimin e sistemit zgjedhor, edhe në rastin kur do të vendoset të votohet me lista shumemërore, votimi duhet të bëhet me lista të hapura.
Ne e konsiderojmë si një përgjegjësi dhe detyrim tonin për të mirërregulluar legjislacionin, me objektiv krijimin e kushteve për funksionimin efektiv të demokracisë përfaqësuese në Republikën e Shqipërisë” shkruhet ndër të tjera në relacionin e tyre. /Opinion.al
