Policia e Shtetit ka publikuar pamjet që tregojnë se si tre adoleshentë grabisin marketet në Tiranë.
Uniformat blu bëjnë me dije se si rezultat i operacionit policor të koduar “Cleaning”, u vu në pranga shtetasi M. B., 18 vjeç, banues në Tiranë, për veprën penale “Vjedhja”. Gjithashtu u proceduan penalisht në gjendje të lirë dy të mitur të moshave 15 dhe 17 vjeç.
Nga veprimet hetimore ka rezultuar se këta shtetas, në bashkëpunim me njëri-tjetrin, kanë kryer disa vjedhje, gjatë javëve të fundit, në disa biznese në Tiranë.
4 prej këtyre vjedhjeve janë dokumentuar me prova ligjore, konkretisht në datën 21 prill tre të rinjtë kanë vjedhur shuma të ndryshme parash, në një market, në rrugën “Brigada e VIII”, po ashtu në datën 26 prill kanë grabitur po një market në rrugën “Bab Rexha”, ndërsa në datën 28 prill kanë vjedhur shuma të ndryshme parash, në një piceri, në rrugën “Teodor Keko”.
Në cilësinë e provës materiale u sekuestruan veshje të cilat dyshohet se autorët i kanë përdorur gjatë kryerjes së vjedhjeve.
Vijon puna për dokumentimin e vjedhjeve të tjera që mund të jenë kryer nga këta shtetas.
