Janë publikuar në media pamjet e shembjes së pallatit 12-katësh në Miami, ku të paktën 51 persona dyshohet se janë nën rrënoja.
Autoritetet deri më tani kanë raportuar për një viktimë, teksa vijojnë kërkimet për gjetjen e personave të tjerë që kanë mbetur nën rrënoja. Shembja e godinës 12-katëshe ndodhi rreth orës 2 të mëngjesit.
“Një person ka vdekur dhe të paktën 10 të tjerë të plagosur, morën ndihmën e parë në vendin e ngjarjes, Kjo është një katastrofë e tmerrshme. Në Shtetet e Bashkuara, ndërtesat thjesht nuk shemben”, tha kryetari i Bashkisë i Surfside, Charles Burkett.
Krahas rezidentëve të përhershëm në ndërtesë mendohet se banojnë edhe persona të cilët kalojnë muajt e dimrit në Florida. Një zyrtar i shërbimit zjarrfikës tha se u arritën të shpëtohen 35 vetë.
Sipas Guvernatorit të Floridës Ron DeSantis ekzistojnë gjasat që nën rrënoja të ketë edhe më shumë viktima. Autoritetet e kanë ende të paqartë se sa njerëz ishin brenda në godinë në orën 2 të mëngjesit kur u shëmb një pjesë e pallatit.
Ndërtesa me 130 apartamente është ndërtuar në vitin 1981 dhe rreth 80 prej tyre janë të zëna me banorë./ Opinion.al
