Zyra e Kryeministrit izraelit njoftoi se armëpushimi në Gaza ka hyrë në fuqi.
Mediat ndërkombëtare bëjnë të ditur se armëpushimi filloi në orën 11:15, me orën lokale, pothuajse tre orë vonesë, pasi Hamasi tha se kishte një vonesë “teknike” në dorëzimin e emrave të tre pengjeve që do të liroheshin në Izrael të dielën.
Mosdërgimi i emrave të pengjeve bëri që hyrja në fuqi e armëpushimit të vonojë, teksa Izraeli tha më herët se do të vazhdojë luftimet derisa emrat të dorëzoheshin, ashtu siç ishte paraparë në marrëveshjen e arritur më herët gjatë javës.
Përmes një deklarate, grupi radikal palestinez tha se është i përkushtuar për marrëveshjen e armëpushimit.
Izraeli tha po ashtu para nisjes së armëpushimit se do të vazhdonte luftimet derisa nuk do të publikohej lista me emrat e pengjeve. Më vonë, ushtria izraelite tha se ka shënjestruar një sërë caqesh të Hamasit në Gazë.
Ministria e Shëndetësisë në Gazë tha se të paktën tetë persona u vranë mëngjesin e 19 janarit.
Me lirimin e tri pengjeve të para pritet të lirohen edhe dhjetëra palestinezë të burgosur në Izrael./Opinion.al
