Prej më shumë se 2 orësh vijon mbledhja e përfaqësuesve të Këshillit Politik në tryezën e Reformës Zgjedhore dhe ashtu siç pritej ajo ka qenë e tensionuar.
Mbledhja e sotme po zhvillohet në ambjentet e Pallatit të Kongreseve dhe jo online. Ajo ka nisur me raportimin e ekspertëve sipas rendit të ditës mbi punën e bërë deri tani.
Megjithatë përpara se mbledhja të niste, në media u publikuan disa e-maile që përfaqësuesit e opozitës, Petrit Vasili dhe Oerd Bylykbashi kishin dërguar në adresë të përfaqësuesve parlamentarë, Damina Gjiknuri dhe Rudina Hajdari dhe ekspertëve ndërkombëtarë që marrin pjesë në këtë proces. Thelbi i shqetësimit të tyre ishin deklaratat e kryeministrit Rama të bëra ditën e djeshme ku ai tha se puna e Këshillit duhet të kufizohet vetëm në rekomandimet e OSBE/ODIHR-it.
“Është e qartë se ky qëndrim publik i kryeministrit është një provokim i rëndë për Këshillin Politik, që minon frymën e konsensusit.”- shkruante ndër të tjera Vasili.
LEXO EDHE –“Rama minoi konsensunsin”, dalin emailet mes opozitës dhe Gjiknurit
Akuzat e bëra në drejtim të mazhorancës në këto e-maile paralajmëruan një mbledhje të tensionuar, ashtu siç edhe ndodhi. Burime për Opinion.al kanë konfirmuar se në sallë ka patur debate të ashpra mes nënkryetarit të LSI, Petrit Vasili dhe bashkëkryetarit të Komisionit të Reformës Zgjedhore, Damian Gjiknuri. Tonet e larta mes tyre kanë bërë që mbledhja të ndërpritet.
Megjithatë ajo ka nisur sërish pas disa minutash. Sipas rendit të ditës në vazhdim pritet të bëhet edhe vlerësimi i ekspertëve në lidhje me pyetjet që i janë bëre nga përfaqësuesit politik nëse propozimet e bëra për sistemin prekin apo jo kushtetutën dhe si mund të adresohen si procedurë./Opinion.al
