Trupat e Gardës Kombëtare mbërritën në Los Angeles në orët e para të mëngjesit të së dielës, pasi presidenti Donald Trump njoftoi dislokimin e 2,000 ushtarëve.
Ky vendim i Trump, për të federalizuar Gardën Kombëtare, e cila zakonisht është nën kontrollin e shtetit, është diçka e pazakontë.
Sipas faqes zyrtare të forcave ushtarake, shkruan BBC, Garda Kombëtare u vu nën kontrollin federal duke përdorur Nenin 10 të Kodit të SHBA, i njëjti ligj që u përdor gjatë epokës së të Drejtave Civile.
Presidentët Eisenhower, Kennedy dhe Johnson e përdorën Gardën Kombëtare për të zbatuar ligjet e të drejtave civile dhe për të ruajtur rendin publik. Garda u federalizua po ashtu gjatë trazirave në Detroit në vitin 1967, pas vrasjes së Martin Luther King Jr. në 1968, si dhe gjatë grevës postare në New York në 1970.
Sipas CNN, hera e fundit që një president e federalizoi Gardën Kombëtare ishte gjatë trazirave në Los Angeles në vitin 1992, pas lirimit të katër oficerëve të bardhë të policisë, të cilët ishin akuzuar për rrahjen brutale të një shoferi me ngjyrë.
Pse është ky vendim i rëndësishëm?
Normalisht, Garda Kombëtare është nën kontrollin e guvernatorëve të shteteve, por presidenti mund ta federalizojë atë në raste të jashtëzakonshme, si trazira apo kërcënime ndaj rendit publik. Ky veprim është i rrallë dhe shpesh shoqërohet me debate politike, pasi mund të shihet si një ndërhyrje e qeverisë federale në punët e shtetit.
Në rastin e Los Angeles-it, Trump e ka marrë këtë vendim pas protestave dhe dhunës që pasuan bastisjet e Agjencisë për Emigracionin dhe Doganat, ICE, ndaj emigrantëve. Guvernatori i Kalifornisë, Gavin Newsom, e ka kundërshtuar këtë lëvizje, duke e quajtur “provokuese” dhe duke paralajmëruar se mund të përshkallëzojë tensionet.
