Zv. ministrja e Shëndetësisë Mira Rakacolli është shprehur se rritja e rasteve të reja me COVID-19 në vendin tonë ishin të pritshme.
Teksa komentoi situatën në të cilën ndodhet vendi, Rakacolli tha gjatë një interviste televizive se përkeqësimi i situatës ishte e parashikuar, pasi ndikon ndryshimi i temperaturave, po ashtu dhe shtimi i varianteve të reja të COVID-19.
Zv. ministrja iu bën apel qytetarëve që të respektojnë masat anti-COVID dhe në asnjë moment të mos e humbasin vigjilencën për t’u mbrojtur nga pandemia.
“Edhe Shqipëria kohët e fundit ka treguar se po ndjek kurbën e rritjes së rasteve që kanë qenë në botë, rajon dhe në Evropë. Kjo ka qenë e dukshme gjatë javëve të fundit dhe tendencat dy javore janë më të dukshme dje ka qenë dhe dita me shifrat më të larta dhe është e qartë tendenca e rritjes së numrit të rasteve të reja. Arsyetimet ne i kemi gjetur pas analizës së përditshme përmes hetimit epidemiologjik. Në dimër njerëzit janë më të grumbulluar, flitet për variantet e reja që mund të jetë ai britanik, brazilian apo i Afrikës së Jugut që duket se kanë një shkallë më të lartë të infektimeve. Shihet një lloj relaksimi në lidhje me zbatimin e masave kufizuese. Nuk bëhet fjalë për faje, por për një gabim dhe unë them se ky është në përgjithësi i njerëzve pasi nuk mund të bësh asgjë me dhunë kur të shpjegohet arsyeja dhe shikohet me sy vlera është e rëndësishme që të bëhesh i ndërgjegjshëm për këtë. Është një moment delikat dhe masat që janë në fuqi dhe që konsiderohen masa me intensitet mesatar nëse respektohen situata do të mbetet nën kontroll”,-tha në “Abc News” Rakacolli. Opinion.al
