Saimir Tahiri është larguar sot nga Shqipëria. Top Channel raportoi se ai ndodhet në Gjermani për arsye familjare. Sakaq avokati i tij tha se ai është një njeri i lirë.
Por a ka të drejtë një person nën hetim, siç është Tahiri të udhëtojë jashtë vendit?
Opinion.al mësoi nga burime pranë Prokurorisë së Krimeve të Rënda se shtetasit Saimir Tahiri nuk i është bllokuar pasaporta.
Për prokurorët e çështjes ishte shumë e nevojshme marrja e autorizimit nga Parlamenti për masën “arrest në burg”, pasi rrezikoheshin provat. Përsa kohë, thonë burimet kjo kërkesë u rrëzua, çdo masë tjetër ishte e pakuptimtë, përfshirë edhe bllokimin e pasaportës.
Burimi konfidencial dhe i besuar i tha Opinion.al se Tahiri duke qenë i lirë ka mundësi të ndikojë për prishjen e provave dhe dëshmitarëve. Pra, për prokurorët si në Shqipëri si jashtë saj, Saimir Tahiri po cënon seriozisht hetimet e nisura ndaj tij për trafik droge dhe shpërdorim detyre.
/Opinion.al
