Shqipëria ishte një nga ato pak vende që nuk u prek nga kriza financiare e viteve 2008-2009. Gjatë një konference që u mbajt në Windsor, Mbretëri e Bashkuar u diskutua mbi politikat e Bankave Qëndrore, ndërsa ish Guvernatori, Ardian Fullani tregoi se si Shqipëria përballoi krizën.
“Banka e Shqipërisë e vuri prioritet stabilitetin financiar përpara fillimeve të krizës globale në 2007, duke e konsideruar atë një kontribut madhor jo vetëm për mbrojtjen e shëndetit të bankave dhe qëndrueshmërinë e sistemit financiar dhe bankar, por edhe rritjen e efiçencës të politikës monetare në mbajtjen në objektiv të inflacionit, si edhe ekuilibrin e kursit të këmbimit si faktorë bazë për një rritje të qëndrueshme ekonomike”, theksoi Fullani.
Sa i përket zhvillimeve teknologjike, me lulëzimin e inteligjencës artificiale, robotikës, si edhe infrastrukturave të reja teknologjike bankare dhe të pagesave në kohë reale, si blockchain dhe monedhat virtuale ish-Guvernatori u shpreh se këto ndryshime janë produkt i kohës ku jetojmë.
Sipas tij ato mund të kenë një impakt mjaft pozitiv në përmirësimin e infrastrukturës bankare, dhe jo vetëm, për të rritur efiçencën e këtyre mekanizmave me qëllim arritjen e ekselencës në shërbimet bankare.
Në lidhje me pritshmërinë mbi bankat qëndrore, Fullani u shpreh se qeveritë duhet të sigurojnë që bordet e bankave qendrore të qeverisen nga autoritete me njohuri komplementare dhe miks kompetencash me qëllim përballimin e sfidave dhe mandateve të reja.
“Bankave qendrore duhet t’u sigurohet autonomia në vendimmarrje me qëllim tërheqjen e talenteve të duhura në realitetin e teknologjisë dhe inovacionit. Bankat qendrore gjithashtu duhet të ruajnë një komunikim ekselent me të gjithë aktorët financiarë dhe t’u qëndrojnë afër atyre me qëllim ruajtjen e stabilitetit financiar dhe shmangien e zhvillimeve të padëshiruara të ngjashme me ato të një dekade më parë. Bankat qëndrore duhet të bëhen më të zhdërvjellëta dhe inovative, për të futur në ombrellën e tyre dhe mbështetur zhvillimet e teknologjisë financiare”, theksoi ish Guvernatori Ardian Fullani.
Viti 2008 do të mbahet në mend si vit që u përshkua me një krizë financiare, e cila paraqitet një herë gjatë një shekulli. Kriza shkaktoi lëkundje të papara në Wall Street, gjunjëzoi sistemin bankar dhe tronditi bursat, por solli edhe ndërhyrje radikale të qeverive.
Shenjat e para të krizës ekonomike u paraqitën në gusht të 2007-ës, por 2008-ta ishte viti i krizës së vërtetë financiare, e cila e futi ekonominë e Shteteve të Bashkuara, Evropës dhe Japonisë në recesion, për herë të parë pas Luftës së Dytë Botërore.
Viti 2008, pos tjerash i dha fund Wall Street-it, një nga institucionet më të mëdha financiare, që u gjunjëzua nën barrën e humbjeve të mëdha nga kreditë, gjë që nxiti rënien e çmimit të naftës.
Viti 2008 do të mbahet në mend edhe për masat e papara radikale të autoriteteve, në përpjekje për të zbutur krizën. Fjalët kolapsi kreditor dhe stimulet fiskale u bënë pjesë e fjalorit të përditshëm. / Opinion.al
