Nga Jorida TABAKU
Debati i ditëve të fundit, nisur nga deklarata e Forumit Davos, ku përfshinte të dhënat në lidhje me nivelin e pabarazisë në vend me të drejtë ngriti shumë reagime. Politikat e qeverisë rilindase nuk mundet të zhbëjnë realitetin e shifrave që lexojmë ne por edhe raportet ndërkombëtare.
Katër vjet pasi kanë implementuar sistemin e ri fiskal me në krye taksën progresive që do të nxirrte nga varfëria 97% të shqiptarëve, rilindja rezulton që ka pasuruar deputetë dhe një grusht njerëzish pranë tyre. Duke kontraktuar tërësisht ekonominë e vendit tonë që në vite pati pësuar një rritje që kulmoi me përmisimin e indeksit GINI (të pabarazisë) gjatë sistemit fiskal të taksës së sheshtë.
Mesa duket, taksa progresive ka ndikuar në rritjen progresive të pabarazisë dhe këtë nuk e pohon opozita por edhe Forumi Davosit. I cili na rendit ndër ato vende ku ndonëse kemi një rritje të PBB-së ajo nuk ka shkuar tek shtresa më e varfër por vetëm tek ajo më e pasur.
Të gjitha politikat e rilindjes, e cila takson si një shtet social por rishpërndan si një shtet bajraktar, kanë ulur në minimum për shtresat e varfra fuqinë blerëse.
Për të kuptuar në praktikë atë çfarë forumi Davos përmend me shifra mjafton t’i hedhim një sy vetëm raportit të INSTAT atë të Indeksit të Çmimeve të Konsumit. Për vitin 2016 INSTAT raporton se inflacioni i vendit tonë është 1.3% (më i ulëti në 15 vjet) por ndërkohë çmimet e shportës së ushqimeve janë rritur ndjeshëm përgjatë vitit 2016. Ky raport pasqyron saktësisht gjendjen që u ka krijuar rilindja shqiptarëve. Ato nuk kanë më fuqi blerëse sepse paratë e tyre thithen nga qeveria përmes taksave dhe tarifave të ngritura, këto dy të fundit duke qenë se prekin direkt kostot e prodhimit apo shpërndarjes kanë sjellë si pasojë rritjen e çmimit të tyre. Zarzavatet në dhjetor 2016 kanë kushtuar 4.6% më shtrenjtë se sa në dhjetorin 2015 ndërsa çmimi bulmetit u rrit me 4.7% në fundin e 2016.
Për rrjedhojë familjet tona paguajnë, sipas INSTAT, 48.7% të të ardhurave për Ushqime dhe pije jo alkoolike. Por ndonëse shifrat e INSTAT flasin për varfërim, qeveria vazhdon të pastrojë listat e personave nga ndihma ekonomike, duke spostuar paratë e buxhetit në zërat e luksit dhe buxhetit kryeministror për ekstravagancën e tij.
Fatkeqësisht, kjo paaftësi i shkon për shtat rilindjes, duke qenë se synimi i tyre nuk është në fund të ditës mirëqenia apo ulja e pabarazisë. Qëllimi i tyre është pushteti dhe ato janë të gatshëm të përdorin çdo mjet, qoftë edhe jo konvencional apo logjik për të. Ekonomia e drogës është alternativa më e mirë për të mbajtur edhe më të varfër qytetarët. Rilindja qartësisht mendon se sa më të varfër të jenë shqiptarët aq më të kollajtë e kanë ato blerjen e votës së tyre, blerjen e të ardhmes së tyre, prandaj vazhdojnë të taksojnë progresivisht duke mos lejuar zhvillimin e një vendi normal që me asetet që zotëron mund të siguronte një të ardhme më të mirë për qytetarët.
