TIRANE- Ka nisur me shtyrje procesi gjyqësor ndaj Mark Frrokut në Gjykatën e Tiranës. Ish – deputeti akuzohet për vrasjen e Aleksandër Kurtit në Belgjikë, në vitin 1999. Gjithashtu, mbi të rëndojnë dhe akuzat e pastrimit të parave dhe ndërtim i paligjshëm.
Në këtë proces, Frroku është i bashkëpandehur edhe Kristian Kurtaj, i cili për këtë seancë nuk kishte dijeni. Edhe pse Kurtjan përfaqësohej nga dy avokatë, Gjykata vendosi të shtyjë gjyqin për në 26 Prill për njoftimin e tij.
Gjykimi në Gjykatën e Shkallës së Parë filloi pas shpalljes së moskompetencës nga ana e Gjykatës së Lartë. Gjatë hetimit, Frroku gëzonte mandatin e deputetit, nga i cili hoqi dorë më pas. Duke qenë se Frroku nuk e kishte më statusin, Gjykata e Lartë u detyrua ta delegojë dosjen në Shkallën e Parë.
Sipas Prokurorisë së Përgjithshme, e cila kreu hetimin, Mark Frroku është autori i vrasjes në Bruksel të Aleksandër Kurtit.
Ai mbante identitetin e Besnik Morinës, Dritan Frroku dhe Piro Sofrani në këtë periudhë dhe në dosjen belge është i cituar më këto emra. Prokuroria e akuzon ish – Deputetin dhe për pastrimin e 2 milionë dollarëve të dyshurara se janë produkt i aktiviteteve kriminale.
Mark Frroku është arrestuar në Mars të vitit 2015. Fillimisht ai u hetua në lidhje me të famshmin “atentat ndaj Doshit”, më pas erdhi dosja nga Belgjika, ku Frroku u akuzua për një vrasje të 15 viteve më parë.
