TIRANË- Këshilli i Mandateve nuk pranoi dje t’i heqë mandatin Mark Frrokut duke ia lënë “topin” Gjykatës Kushtetuese. Kolegët deputetë të Frrokut nuk patën guximin me sa duket të largojnë nga Parlamenti deputetin e Shkodrës Mark Frroku i cili është prej 6 muajsh në paraburgim, i akuzuar për një vrasje në Belgjikë.
Jo vetëm mazhoranca, por edhe opozita, që bëri kërkesën, në fund u dakordësuan që t’i drejtohen Kushtetues për interpretimin e nenit 71. Por çfarë e mban peng këtë vendim? Juridikisht vetëm një fjalë: “pa arsye”.
Sipas ligjit në fjalë nëse deputeti mungon 6 muaj “pa arsye” i hiqet mandati. Pyetja që shtrohet sot është a ka munguar me arsye apo pa arsye Mark Frroku për 6 muaj rresht?
