Kryediplomati holandez Stef Blok po viziton sot Tiranën ku u takua me homologun Ditmir Bushati. Në deklaratën për mediat ai u pyet se pse Holanda voton kundër hapjes së negociatave të Shqipërisë me BE. Z. Blok tha se shteti ligjor është thelbësor dhe se Holanda nuk ka mbajtur qendrim të diferencuar ndaj Shqipërisë.
“Holanda është e angazhuar për perspektivën europiane ama në bazë të progresit të dukshëm dhe konkret”, theksoi ai. “Unë e kam theksuar se Shqipëria deri më tani ka pasur një progres shumë të mirë, por ky progres duhet të jetë i qëndrueshëm në kohë dhe i vazhdueshëm. Mbete për t’u parë raporti i KE, për të folur me qartë lidhur me vendimin për hapjen e dritës jeshile për Shqipërinë në BE”, është shprehur më tej.
Azilantët
Stef Blok: “Është e rëndësishme të ruhet fokusi tek konsolidimi i reformave shtesë për tu ruajtur fokusin në luftën kundër korrupsionit dhe krimit të organizuar. Duhen dekurajuar njerëzit për të emigruar në azil. Orvatjet e tyre do të jenë të pafrytshme. Po punojmë së bashku për të luftuar këtë dukuri”.
Tenderi i aeroportit të Vlorës
Sa i takon 8 pyetjeve që deputeti holandez, Dieter Omtzigt , i ka drejtuar z. Blok lidhur me dyshime mbi tenderin e aeroportit të Vlorës dhe “Air Albania”, ministri holandez u shpreh se në traditën parlamentare holandeze, pyetjet janë pjesë e procesit dhe se të gjithë deputetët ngrenë pyetje të vazhdueshme dhe se nuk bëhet vetëm për ndonjë rast specifik.
Më konkretisht për 8 pyetjet mbi qeverinë shqiptare ai është shprehur se janë njohur së fundmi me këto pyetje dhe se ende nuk i kanë shqyrtuar dhe në momentin që do të vihen në kontakt dhe të kenë një përgjigje për secilën, do t’i bëjnë publike.
