Me gjasë nesër Saimir Tahiri nuk përfundon pas hekurave. Ky vendim është marrë nga Partia e tij edhe pse thuhet me diplomaci. Të paktën këtë të shtunë kur do të mblidhet sërish Këshilli i Mandateve nuk pritet të ketë zhvillime që ecin kundër Tahirit.
E gjithë çfarë ndodhi sot në këshill, sipas socialistëve tregoi nxitim nga ana e prokurorisë për të arrestuar me urgjence Saimir Tahirin pa patur prova dhe fakte por vetëm disa përgjime që nuk e bindin këshillin në fajësinë e tij.
Gjatë një debati televiziv në “Studio e Hapur” në News 24 mes dy juristëve, Çlirim Gjata dhe Vasilika Hysi u vu re fakti se socialistët presin ende më shumë material nga prokuroria për tu bindur për heqjen e mandatit të Tahirit.
Pyetjes së Gjatës se pse gjykoni provat sepse nuk jeni gjykatë, por këshill, Vasilika Hysi u përgjigj: “Kuvendi jep autorizim për heqjen e mandatit kur dokumentet e prokurorisë shoqërohen me prova. Momentalisht prokuroria nuk ka as minimumin e provave për Tahirin. Nuk ka asnjë arsye për tu nxituar. Cila është urgjenca që e detyroi prokurorinë të dalë me kërkesë për arrest pa përkthyer ende materialet e ardhura nga Italia? Ne nuk bëjmë një votim symbyllurazi sepse kjo do jetë e dëmshme dhe për hetimin. Prokuroria të mbledhë fakte dhe prova, ti kopsisë dhe të vijë me kërkesë për heqje mandati”. /Opinion.al
