Me shpresën se e ardhmja do të jetë më e mirë dhe më e sigurt, samiti i Berlinit nuk përfundoi me ato rezultate që prisnin vendet e Ballkanit Perëndimor. Në këtë samit është diskutuar perspektiva e rajonit të Ballkanit perëndimor, me theks të veçantë në zgjidhjen e problemeve ekzistuese. Në prani të liderëve të vendeve ballkanase, mes të cilëve kryeministri Edi Rama, u diskutua mes të tjerash për normalizimin e marrëdhënieve mes Kosovës dhe Serbisë.
Sikurse paralajmëroi më herët presidenti Makron, në sesionin përmbyllës të samitit u diskutuan të gjitha opsionet e mundshme në mënyrë që palët të rikthehen në dialogun e ndërmjetësuar nga Brukseli.
Kancelarja Merkel dhe presidenti Makron, në prani edhe të shefes së Politikës së Jashtme të BE, Federika Mogerini morën si shembull Marrëveshjen e Prespës për tejkalimin e mosmarrëveshjeve në rajon. Ndërkohë gazetari Baton Haxhiu që ka ndjekur nga afër punimet e këtij samiti tha thënë seështë ndryshuar formati – nga prezantimi i një lideri në dy liderë – për shkak të kryeministrit kosovar, Ramush Haradinajt.
“Ky takim është një nderim që i është bërë kryeministrit Ramush Haradinaj për arsye se e ka mbajtur peshën e situatës dhe e ka mbajtur premtimin që taksa do të mbetet, gjë për të cilën Gjermania ka qenë shumë e interesuar”.
Haxhiu në Info Magazine të Klan Kosovës ka komentuar dhe mospjesëmarrjen e presidentit shqiptar, Ilir Meta. Sipas tij kjo ndodhi për shkak të rënies së besueshmërisë së tij.
“Besueshmëria e Metës ka rënë dukshëm dhe kjo tregon se ai duhet të rishikojë pozicionin e vet. Kjo e bën atë me status të presidentit të pafuqishëm dhe të pandikueshëm në këso konferenca ku mund të vendoset e ardhmja e regjionit”./ Opinion.al
