Ministria Ruse e Mbrojtjes tha më herët se ka marrë nën kontroll qytetin jugor të Ukrainës, Kherson.
Sipas BBC nëse konfirmohet atëherë kapja e këtij qyteti jugor me pothuajse 300,000 banorë do të ishte një fitore e madhe për ushtrinë ruse.
Do të ishte qyteti më i madh që do të binte në duart e Rusisë dhe strategjikisht do të ishte një bazë jetike për ushtrinë, pasi ajo kërkon të pushtojë më tej territore në brendësi dhe në perëndim të Ukrainës përgjatë bregdetit deri në qytetin e madh port të Odesës. Kherson është në vetvete një port i rëndësishëm i Detit të Zi dhe një qendër industriale.
Të kontrollosh Kherson do të thotë të kontrollosh gjithashtu një burim të madh uji. Ukraina e mbylli kanalin e Krimesë së Veriut pasi Rusia pushtoi gadishullin e Krimesë, kështu që shumica e furnizimit me ujë të freskët në Krime u ndërpre, duke shkaktuar mungesë uji në rajonin e aneksuar.
Një nga objektivat e para të pushtimit ushtarak të Rusisë ishte zhbllokimi i asaj rruge ujore dhe rivendosja e furnizimit me ujë në Krime.
BBC raporton se automjetet ruse hynë në qendër të qytetit Kherson gjatë natës. Kryebashkiaku Igor Kolyikhayev tha këtë mëngjes se qyteti kishte nevojë për një mrekulli.
