Në korridoret politike flitet për pakanëqësi nga partitë e vogla të djathta për fuqizimin e rolit të LSI si opozitë dhe ka xhelozi për marrëdhënien që ajo po krijon me PD. Duke folur për Panoramën, kreu i LZHK, Dashamir Shehu është shprehur se “ne, ndryshe nga LSI, nuk hyjmë me PS-në në qeveri dhe ky është një ndryshim i madh. Ne nuk jemi në opozitë kur nuk jemi në qeveri, ne jemi gjithmonë në opozitë kur përballë kemi të majtën. Këtu bëhet dallimi mes së majtës dhe së djathtës, jo dy ndërmarrjeve”, sqaron Shehi.
Ndërkohë, për kreun e PAA-së, Agron Duka, prezenca e LSI-së në koalicionin opozitar nuk duhet parë si një pengesë, por si një kontribut për të arritur qëllimin, që është largimi i qeverisë.
“Mua personalisht nuk më shqetëson prezenca e LSI-së në koalicionin opozitar. Për ne, sa më shumë individë dhe forca politike të na bashkohen, aq më mirë është për realizimin e qëllimit tonë, që është largimi i kësaj qeverie. Interesi ynë politik është largimi i qeverisë dhe çdo faktor që na mundëson arritjen e këtij qëllimi, është i dobishëm”, thekson Duka.
Dy ditë më parë, në një takim që kreu i PD-së, Lulzim Basha, zhvilloi me aleatët e tij të së djathtës, është njohur me disa kërkesa të tyre lidhur me avancimin e Reformës Zgjedhore dhe rolin që po mban LSI.
Kryetarët e partive aleate të PD-së i kanë kujtuar Bashës se LSI ka po aq përgjegjësi sa edhe PS për keqqeverisjen e vendit pasi disa muaj më parë ishte në qeveri me ta. Bashës i është sugjeruar që të mos e shohë LSI-në si një aleat potencial edhe për zgjedhje, pasi një koalicion i tillë nuk do ta rriste të djathtën as në sytë e qytetarëve shqiptarë.
Ndërsa Basha, ka sqaruar në takim se aleanca me LSI-në është e qartë dhe ajo lidhet me largimin e Edi Ramës. Basha ka theksuar se për arritjen e këtij qëllimi, PD është e hapur të bashkëpunojë me çdo forcë politike.
Një ditë më parë Monika Kryemadhi do të deklaronte për aleatët e vjetër të PD-së se “LSI ka peshën e vet ne elektorat. LSI ka mandatet e veta, aleatet e PD të qetësohen se LSI ka listen e vete dhe nuk dëshiron emrin në listën e PD. Sot ka nevoje për çdo grimce opozitare. Ne nuk duam mandate qyl nga PD, thënë kjo, aleatët e PD-së duhet të qetësohen. LSI nuk do mandate qyl dhe as thela në qeverinë imagjinare. Rama nuk e merr dot peng opozitën. Rilindja eshte nje sekt kriminal nuk ka lidhje me PS”.
