Pse Koln nuk i ofron Mërgim Mavrajt një kontratë të re, pyetet “Geissblog Koeln”.
Portali gjerman “Geissblog Koeln”, që i kushtohet skuadrës gjermane të Kolnit ka publikuar një artikull të veçantë për Mërgim Mavrajn dhe mungesën e rinovimit të kontratës së mbrojtësit shqiptar nga klubi që është kthyer në surprizën e këtij edicioni në Bundesligë.
“Ai është kthyer në një lojtar të domosdoshëm të formacioni. A do të vlerësohen tashmë arritjet e tij me një kontratë të re?”, shkruhet në artikullin me titull “Mbrojtësi i nënvlerësuar: Kur do të rinovojë Mavraj?”, ku kujtohet se marrëveshja aktuale e mbrojtësit të përfaqësueses shqiptare përfundon në fund të edicionit, në qershorin 2017, përcjell “Panorama Sport”.
Sipas këtij portali, Mavraj ka arritur të kthehet në një lider të prapavijës, ndonëse nuk bie shumë në sy me lojën e tij.
“Edhe pse ka defiçite shpejtësie ndaj kundërshtarëve që i vijnë përpara me vrull, Mavraj zgjidh shumë momente falë paraprirjes së situatave të ndryshme të lojës. Kjo është arsyeja se pse lojtari i lindur në Hanau ka marrë vetëm dy kartonë të verdhë gjatë të gjithë eksperiencës së tij në Këln”, shkruhet në këtë artikull.
Gjithsesi, ekziston besimi se Mavraj do të vazhdojë të jetë pjesë e Këln edhe pas mbylljes së këtij sezoni. “Është e vështirë të imagjinohet që Këln, i cili vlerëson shumë shefin e ri të mbrojtjes, të lejojë shqiptarin të largohet si futbollist i lirë në fund të sezonit”.
