Java që vjen do të jetë e rëndësishme në aspektin politike. Nisma rajonale e bashkëthemeluar nga presidentët e Sllovenisë dhe Kroacisë në vitin 2010, njohur ndryshe si Procesi i Brdo-Brijunit, do të zhvendoset më 8-9 maj në kryeqytetin shqiptar, Tiranë, ku organizator do të jetë pikërisht Presidenti i Republikës, Ilir Meta.
Në samitin e Tiranës, siç njofton Presidenca, do të marrin pjesë 3 anëtarët e Presidencës së Bosnje-Hercegovinës, Milorad Dodik, Sefik Dzaferoviç dhe Zeljko Komsiç; presidenti i Kosovës, Hashim Thaçi; presidenti i Malit të Zi, Milo Djukanoviç; ai i Maqedonisë në largim Gjorge Ivanov; si dhe presidenti serb Aleksandar Vuçiç, që të gjithë të ftuar nga Kolinda Grabar-Kitaroviç dhe Borut Pahor, krerët aktualë respektivë të Kroacisë dhe Sllovenisë.
Në punimet e samitit të Tiranës do të jenë të ftuar nderi edhe presidenti polak, Andrzej Duda, si dhe përfaqësuesja e lartë e Bashkimit Europian për Punët e Jashtme dhe Politikat e Sigurisë, njëherazi zv.presidente e Komisionit Europian në largim, Federica Mogherini.
Kjo e fundit sa i përket krizës politike në Tiranë do të ketë takime me kryeministrin Edi Ram si dhe opozitën. Vizita e saj vjen në një moment kur PD ka prezantuar platformën për qeverinë tranzitore, ndërsa po përpagitet për protestën e radhës kombëtare, atë të 11 majit. Vetë kreu i PD-së, Lulzim Basha ka thënë se 11 maj përballja do të jetë vendimtare.
Për largimin e Ramës, Basha u tha lezhjanëve të shtunën se duhet t’i bashkohen në protestën e 11 majit. “11 maji na thërret në një tjetër përballje vendimtare”, theksoi ai.
Për qeverinë tranzitore, kryeministri Edi Rama e ka refuzuar që në krye të herës, ndërsa për protestat si masë paraprake ka futur ndryshimet e kodit penal. Ai që bllokon rrugët apo godet efektivin e policisë do të dënohet me burg./ Opinion.al
