Nga Elbasani, ku po zhvillohet edhe mbledhja e përbashkët mes dy shteteve, Kosovë-Shqipëri, është folur edhe për leje-qëndrimet 5-vjeçare që do të mund të marrin shtetasit e secilit vend.
Pas prezantimit, nga dy ministrat e Brendshëm, ka ardhur edhe reagimi i kryeministrit Rama, i cili ka kërkuar heqjen e këtij afati 5-vjeçar.
Sipas tij dhënia e leje-qëndrimeve për 5 vite është një pengesë psikologjike.
“Pasi njerëzit të martohen duhet të vijnë ta konfirmojnë prapë lejen te ju”- tha Rama, ndërsa ministri i Brendshëm i Kosovës Xhelal Sveçla sqaroi se afati vlen për kategori të veçanta dhe bëhet automatikisht.
Biseda mes kryeministrit dhe dy ministrave të Brendshëm:
Rama: Një pyetje kam se gjithmonë e kam këtë kuriozitet se si funksionon racionalja e ministrit të Brendshëm? Pse e bëni këtë lejen 5 vjet për shembull. Do martohen njerëzit në bashkim familjar edhe pas 5 vjetësh do vijnë prapë te ju që tu konfirmojnë që janë prapë bashkë dhe do rrinë më gjatë. Pse nuk e hiqni? E marrin lejen për tu martuar nga familjet përkatëse, juve ju njoftojnë që janë martuar dhe do jetojnë në Kosovë ose Shqipëri, me këtë njoftim jepni lejen e qëndrimit.
Sveçla: Në shembullin që ju përdorët patjetër që nuk do ketë nevojë.
Rama: Po mirë, në cilin rast doni ju që të vijë prapë njeriu te ju?
Sveçla: Leja 5-vjeçare do të vlejë psh për studentët, të punësuarit, por nuk nënkupton se ai pas 5 vitesh do vijë prapë…Automatikisht do ti zgjatet.
Rama: Po hiqeni fare se duket si pengesë psikologjike. Hiqeni, si thoni…Mos ta heqim me votë këtu se dilni minorancë.
Çuçi: Nuk ka nevojë për votë, se i vëmë një zero mbrapa, i themi 50 vjet.
