Data 7 Shtator ishte shënuar prej kohësh në axhendë për një takim në Bruksel mes Presidentit të Kosovës, Hashim Thaçi dhe atij të Serbisë Aleksandër Vuçiç me prezencën e shefes së diplomacisë në BE, Federica Mogherini. Në një deklaratë për mediat në Bruksel, sot në 09:00, Thaci u shpreh optimist për negociatat. Por më pas gjthçka ndryshoi. Thaci e Vuciç zhvilluan takimeve të veçuara me Mogherinin e më pas, drejtori i zyrës së qeverisë serbe për Kosovën, Marko Gjuriç doli para gazetarëve për të njoftuar se Vuçiçi nuk ka pranuar të takojë Thaçin (ora 11:00).
Sipas tij, kjo erdhi pasi Prishtina po përpiqet të bllokojë vizitën e Vuçiçit në Kosovë dhe nuk mbështet asnjë interes serb në Kosovë. “Sot nuk kemi as të dhënën më minimale që të flasim me përfaqësuesit e Prishtinës. Pas të gjitha shëmtirave që kanë bërë ata, ne as nuk duam t’i shikojmë”, tha ai.
Gjuriç ka theksuar, se është e papranueshme që presidenti Thaçi shton në bisedime kërkesa për Preshevën, Medvegjën dhe Bujanovcin, sepse në dialog diskutohet vetëm shteti i Kosovës. Sipas burimeve të Deutsche Ëelles, Aleksander Vuçiç do të vendosë sot në mbrëmje, nëse do të vizitojë në fundjavë Kosovën. Gjuriç theksoi se “nëse ai vendos të shkojë, atëherë është absolutisht e sigurtë që ai do të vizitojë edhe Gazivoden, që ai do të lëvizë i lirë në Kosovë.”
E pra kleçka mbetet tek Gazivoda.
Një ditë më parë mediat serbe paralajmëruan, duke shkruar se “autoritetet në Prishtinë e kanë njoftuar Beogradin se presidentit të Serbisë do t’i ndalohet që ta vizitojë liqenin e Ujmanit (Gazivodës) pasi paraqet provokim.
Gjithsesi pala kosovare ende nuk ka dhënë deklaratë mbi shkaqet që çuan në anulimin e takimit. Statusi i fundit në facebook i Thaçit është per takimin me Mogherinin.
“Bashkë me zëvendëskryeministrin e parë, Behgjet Pacolli, sapo përfunduam takimin bilateral me përfaqësuesen e Lartë për Politikë të Jashtme të BE-së, Federica Mogherini. Kosova është e përkushtuar që të arrijë një marrëveshje përfundimtare me Serbinë, e cila garanton njohjen reciproke, anëtarësimin në BE, NATO dhe OKB. Ky rrugëtim do të jetë i vështirë, por i domosdoshëm për sigurimin e paqes afatgjatë në Ballkanin Perëndimor dhe ka mbështetje të gjithanshme”, shkruan Presidenti i Kosovës.
/Opinion.al
