Mëngjesin e kësaj të enjteje paneli i të ftuarve në studion e “Shije Shtëpie” në Tv Klan diskutoi sa i takon një fenomeni që gjithnjë e më shumë po bëhet shqetësues.
Braktisja e fëmijëve me aftësi të kufizuara e aq më tepër nga prindërit, mund të konsiderohet si një gjë absurde, por jo e padëgjuar.
Brixhida Muça, drejtuese e qendrës “Lumturo Dhimbjen” tha se të tilla raste për fat të keq ndodhin dhe në vendin tonë.
Ajo shtoi se në shumicën e rasteve janë burrat të cilët braktisin fëmijët e tyre që janë me aftësi ndryshe. Më tej Muça tregoi dhe arsyet që çojnë prindërit, e kryesisht baballarët për të braktisur fëmijët.
“Braktisja e një fëmije, me aq sa unë kam hasur, më shumë vjen nga baballarët. Janë ata të cilët e braktisin fëmijët sapo marrin vesh që është me aftësi të kufizuara, çfarëdo lloj qoftë. Ose më vonë gjatë rrugëtimit të jetës me fëmijën. Braktisja vjen në forma të ndryshme. Zakonisht ka ardhur si një dhunë psikologjike ndaj nënës, sikur ajo është autorja e kësaj gjendjeje dhe ajo ndjehet shumë e flustruar dhe e rënduar psikologjikisht. Arsyet që çojnë një prind dhe në rastin konkret një baba, për të përgatitur fëmijën, është se është i papërgatitur për jetën dhe ai ia lë gjithë barrën nënës.”
Muça tha se “paaftësia” për të marrë përgjegjësi ose për të përballuar sfidat e jetës bën që shumë burra të shkojnë drejt divorcit, tradhtisë apo veseve.
Duke braktisur kështu jo vetëm fëmijët, por dhe bashkëshortet.
“Përballë të gjitha vështirësive për të qenë në krah të gruas bën që ai të dobësohet dhe të dalin forma braktisjesh të ndryshme me divorc, tradhti, me vese apo mos marrja e përgjegjësive. Zakonisht fillon kështu derisa arrin në braktisje totale, ose mund të vazhdojë kështu përgjatë gjithë jetës. Gjithë pesha i mbetet gruas, shumë rrallë ka baballarë që marrin përgjegjësi. Në raste, shumë të rralla kur gratë mund të “llastohen” që gjithë kohës vajtojnë dhe e merr rolin babai”, tha Muça.
