TIRANE- Partia Socialiste ka reaguar sot pas intervistës se Zaganit, bërë nga Basir Collaku dhe transmetuar në Opinion mbrëmjen e së enjtes. Sipas tij ministri Tahiri sulmohet nga PD-ja pasi preu lidhjet e trafikut të drogës.
Deklarata e plotë e deputetit te PS Ervin Bushati
Dëgjuam sot numrin dy të Partisë Demokratike, Sekretarin e Përgjithshëm Arben Ristani, që sërish hedh balte mbi punën e Policisë së Shtetit dhe Ministrisë së Brendshme. Sigurisht, puna e këtyre dy viteve, sidomos në luftën e hapur ndaj krimit të organizuar dhe trafikut të drogës, ka prishur shumë pazare dhe interesa. Por që pjesë e këtyre pazareve dhe interesave të ishin edhe përfaqësues të Partisë Demokratike; kjo është për të ardhur keq.
Ndërkohë që Arben Ristani hedh baltë, dhe merr për bazë gënjeshtrat e një individi që kërkohet nga drejtësia shqiptare, ne dëshirojmë të përgjigjemi me fakte:
Sot që flasim, falë punës së Policisë së Shtetit, numri i vrasjeve krahasuar me vitin 2013 është përgjysmuar. Sot që flasim, falë kontrollit të rreptë të Sigurisë Rrugore, kemi numrin më të vogël të aksidenteve në rrugë që nga viti 1997.
Në vitin 2013, “Guardia di Finanza”, raportonte 323 hektarë, tokë të kultivuar me bimë narkotike. Qeverisja e Partisë Demokratike kishte arritur të asgjësonte vetëm 7,5% të këtyre parcelave. Sot, 99,2% e sipërfaqes së kultivuar është shkatërruar nga Policia e Shtetit. Janë asgjesuar 1,3 milionë bimë narkotike. Thënë ndryshe, qeveria jonë në dy vite ka asgjesuar 46% më shumë drogë se qeverisja e Partisë Demokratike në tetë vite marrë së bashku.
Ndaj, shqiptarët janë të qartë: Nga një anë është Partia Demokratike që hedh baltë dhe për aleatë ka të kërkuarit nga drejtësia, nga ana tjetër janë shifrat që flasin më shumë se fjalët
