Ish-kryeministri, Sali Berisha, ka dhënë një deklaratë për mediat, pas miratimit të buxhetit të vitit 2024 me votat e mazhorancës, mes kaosit dhe tymueseve në Kuvend.
Jashtë sallës së Kuvendit, Berisha tha se PS kaloi brenda 5 minutave projektbuxhetin për vitin 2024 ndërsa e cilësoi procesin si klandestin.
Berisha theksoi se flakadanët në Kuvend që vendosi opozita, dogjën procedurën antikushtetuese.
“Ata kaluan brenda 5 minutash këtë akt. Jemi këtu si proces klandestin. Buxheti, akt themelor i këtij parlamenti, duhet të merrte të gjithë dimensionet. Nuk ka evidenca as për votim, dhe as për cicërim të shërbëtores së Ramës, Lindita Nikollës. Kjo dëshmon drejtësinë dhe betejën pa kthim të opozitës. Pasi u bë e pamundur hajdutëve që të mbrojnë vjedhjet e tyre dhe të mashtrojnë shqiptarët. I bëri të pamundur Ramës që të ligjërojë vjedhjen e gjobës më të madhe. Ata flakadanë dogjën procedurën antikushtetuese. A e pe ti se Rama po ndiqte FB tim. Aty ishte kohë proteste”, tha Berisha.
