Kur qeveria nisi procedurat për shkarkimin e presidentit Ilir Meta, në lidhje me dekretin e zgjedhjeve lokale, Komisioni Hetimor parlamentar do të deklaronte se do të respektonte mendimin e Komisionit të Venecias.
Vetë “Venecia”, në opinionin përfundimtar lidhur me vendimin e Presidentit për të anuluar 30 qershorin si datë të zgjedhjeve, thekson se Ilir Meta mund të ketë vepruar përtej kompetencave kushtetuese, por veprimet e tij mund të mos justifikojnë shkarkimin nga detyra.
E ndërsa tani, kur Presidenti i ka dalë sërish kundër qeverisë sa i përket Gjykatës Kushtetuese për emërimet, duket se PS nuk do të qëndrojë pa bërë një tjetër lëvizje.
Duke qenë se rezoluta e miratuar në Kuvend, nuk pati ndonjë efekt për Gjykatën Kushtetuese, kreu i grupit Parlamentar i PS-së ka kërkuar që Komisioni Hetimor Parlamentar i ngritur për shkarkimin e Metës, të marrë në konsideratë edhe vendimet e fundit të Presidentit.
“Presidenti i Republikës, me një kurs të përplasjes me Kuvendin ka vijuar të shkel Kushtetutën. Vlerësojmë të domosdoshëm që këto vlerësime të bëhen nga Kuvendi i Republikës për shkarkimin e presidentit. Kushtetuta jonë, rregullorja, nuk ndalojnë komisionin Hetimor në punën e tij dhe Kuvendi nuk mund të vendosë kufizime për këtë çështje. Nëse kjo kërkesë nuk vlerësohet si në shkelje të Kushtetues, atëherë shkresa është detyrim dhe jo diskrecion i Kuvendit. Një palë që ka dorëzuar një kërkesë mund të ndryshojë dhe të shtojë atë. Dekreti i presidentit për Xhaferllarin është nxjerrë në shkelje të Kushtetutës. Njësoj siç veproi me dekretin për zgjedhjet, veproi njësoj si me Xhaferllarin”, tha Balla. / Opinion.al
