Teksa Partia Socialiste i kërkoi zyrtarisht Komisionit Qendror të Zgjedhjeve që të çregjistrojë kandidatin e koalicionit “Bashkë fitojmë” për Shijakun, Rezeart Tusha, ka qenë ky i fundit që ka reaguar duke shpjeguar akuzat ndaj tij.
Përmes një deklarate për mediat, Tusha, sqaron publikun se kërkesa e PS, është përpjekje për ta skualifikuar nga gara, pasi sipas tij socialistët i ka kapur paniku për humbjen e pritshme në 14 Maj.
Më tej ai thotë se në formularin e dekriminalizimit ka deklaruar se ka një kundravajtje në Zvicër, për shkelje të lejes së qëndrimit. Tushe, thotë se, këtë e ka deklaruar edhe në formularin për zgjedhjet e vitit 2021, kur ka qenë në listat e Partisë Demokratike, si kandidat për deputet, kohë kur është verifikuar edhe nga Prokuroria e Posaçme.
“Siç mund ta keni parë, mediat pranë pushtetit, me porosi qeveritare, kanë nisur kundër meje një seri sulmesh bazuar në shpifje e shtrembërime. Së pari, kjo dëshmon se i ka kapur paniku për humbjen pritshme më 14 maj, dhe shpresojnë ta mundin Partinë Demokratike dhe kandidatin e saj në tavolinë. Përpjekja për të më skualifikuar mua si kandidat të koalicionit “Bashkë fitojmë”, nuk bëhet se u intereson e vërteta, por se e dinë se çfarë i pret në Shijak këto zgjedhje. Së dyti, unë dua të sqaroj opinionin publik në lidhje me atë që qeveria dhe mediat pranë saj quajnë “dënim”.F akt ky që ndodhet vetëm në imagjinatën e tyre, jo në dokumente zyrtare. KQZ më ka regjistruar për zgjedhjet e 14 majit, për arsye se e kam dorëzuar formularin përkatës ku deklaroj se kam një kundravajtje në Zvicër, për shkelje të lejes së qëndrimit. Këtë e kam deklaruar edhe në formularin për zgjedhjet e vitit 2021, kur kam qenë në listat e Partisë Demokratike, si kandidat për deputet. Në 2021, kur u ngrit ky pretendim për ‘dënim’, KQZ e çoi formalisht ne Prokurorinë e Përgjithshme për verifikim të thelluar nga sektori i dekriminalizimit dhe mora dritën jeshile të kandidimit. Kjo është e vërteta me dokumente, të cilat do t’i vë në dispozicion të medias dhe publikut bashkë me këtë deklaratë. Kjo është pjesë e luftës politike, përpjekje amorale e qeverisë për të më skualifikuar nga zgjedhjet. Nuk u vë faj, se u është bërë huq që, ose i vjedhin zgjedhjet, ose i fitojnë pa asnjë kundërshtar përballë. E kanë kot. Do të më kenë përballë më 14 maj, jo vetëm si kandidat por edhe si gardian të votës së lirë. Për shijakasit e mi kam vetëm një thirrje: mos u trembni! Bashkë fitojmë!”-tha Rezeart Tusha.
Në një letër drejtuar KQZ të firmosur nga sekretari për çështjet ligjore dhe zgjedhore të PS, Eridian Salianji thuhet se Tusha rezulton të jetë dëbuar nga Zvicra në 1997 për posedim të lëndëve narkotike.
