Sekretari i Përgjithshëm i PS dhe njëherësh kreu i Grupit Parlamentar të kësaj partie, Taulant Balla, ka reaguar përsëri edhe ditën e sotme për kontratën e lidhur nga kryedemokrati Lulzim Basha me një kompani amerikane lobimi nën dyshimin se është fshehur burimi i financimit.
Balla tha se kreu i PD-së, Basha po fshihet nga përgjegjësia, pasi ai duhet të përgjigjet menjëherë se cili është burimi i atyre parave.
Sipas tij, pse ai nuk i ka deklaruar ato para dhe ato pagesa në KQZ dhe si kanë përfunduar në një parajsë fiskale.
“I bëj thirrje Klement Zgurit dhe administratës së KQZ të mos bëjnë asnjë regjistrim deklarimi shpenzime shtesë nga ana e subjektit politik PD, apo ndonjë falsifikim protokolli për gjoja deklarim të mëparshëm, sepse është vepër e rëndë penale, prishje e provave të veprës penale”,-thekson Balla.
Taulant Balla: Sigurisht që fillimi i hetimeve nga Prokuroria mbi kontratën e paligjshme të Lulzim Bashës me një kompani të huaj, të paguar nga një burim i padeklaruar parash, është një detyrim ligjor.
Por Lulzim Basha duhet të përgjigjet menjëherë se cili është burimi i atyre parave.
Pse nuk i ka deklaruar ato para dhe ato pagesa në KQZ, dhe si kanë përfunduar në një parajsë fiskale? I bëj thirrje Klement Zgurit dhe administratës së KQZ të mos bëjnë asnjë regjistrim deklarimi shpenzime shtesë nga ana e subjektit politik PD, apo ndonjë falsifikim protokolli për gjoja deklarim të mëparshëm, sepse është vepër e rëndë penale, prishje e provave të veprës penale.
Ku i ka gjetur Partia Demokratike dhe Lulzim Basha këto shuma marramendëse parash? 1 milion dollarë? Këta që flasin për ditë për para të pista e vota të blera, ku i kanë gjetur 1 milion dollarë?
Pse Lulzim Basha ka përdorur llogaritë e një kompanie offshore për të bërë pagesa në emër të Partisë Demokratike?
Cila është marrëdhënia mes Partisë Demokratike dhe kompanisë “Biniatta Trade LP”, e cila është në pronësi të një zinxhiri kompanish të regjistruara në Belizë, një shtet i Amerikës Qëndrore i njohur si parajsë fiskale.
Në emër të kujt janë regjistruar kompanitë offshore në Belizë?
A ka dijeni Lulzim Basha se kush janë personat nga Shqipëria që kanë transferuar para në llogaritë e kompanive offshore në Belizë dhe më pas tek Binniatta Trade, për të përfunduar në pagesa për llogari të Partisë Demokratike?
Kush janë lidhjet e Lulzim Bashës me këta persona?
A është financuar Partia Demokratike nga para të pista, nga persona të dyshuar për veprimtari kriminale?
Kujtojmë edhe një herë se Lulzim Basha dhe askush tjetër, e di të vërtetën e përdorimit të vulës së kryetarit të PD për këtë makinacion financiar, që do të kishte tronditur çdo parti politike në çdo vend demokratik.
Reagimi i ditës së djeshme në Facebook:
