Partia Socialiste ka kërkuar që deputeti Gent Strazimiri të procedohet penalisht në kushtet e flagrancës të armëbajtjes pa leje.
Me anë të një deklarate për mediat deputeti socialist Taulant Balla tha se pritëm për disa orë që Partia Demokratike të dënojë incidentin e rëndë, të provuar tashmë, të armëmbatjes pa leje të deputetit të saj Gent Strazimiri.
Balla tha se në vend që Partia Demokratike minimalisht të distancohet dhe të përjashtojë këtë shkelës të ligjit nga radhët e veta dhe të mbështesë Policinë e Shtetit dhe drejtësinë të bëjnë detyrën e tyre në këtë rast, po i ofrojnë mburoje politike.
Ai theksoi se Sekretari i Përgjithshëm i PD, Arben Ristani, me paturpësi ka shkuar deri aty sa ta quajë këtë incident të rëndë si një inskenim të mediave, megjithëse shkelësi i ligjit G.S. e pranoi vetë këtë vepër kriminale.
Ndër të tjera, Balla bëri me dije se duke i konsideruar veprimet e deritanishme të Policisë së Shtetit si tepër korrekte, kërkojmë që sipas ligjit shtetasi G.S të procedohet penalisht në kushtet e flagrancës të armëmbatjes pa leje.
Deputeti socialist vuri në dukje që kjo vepër penale është e përfshirë në Ligjin për Dekriminalizimin.
“Është rasti që PD të dëshmojë me vepra dhe jo me fjalë respektin ndaj ligjit”,- deklaroi Balla.
