Kryetari i Komisionit të Reformës në Drejtësi, Fatmir Xhafaj, ka thënë sot se në seancën e së enjtes në Kuvend do të miratohen 7 ligjet e paketës emergjente për reformën në drejtësi, ndonëse opozita ka dhënë konsensus vetëm për një ligj, ai që ka të bëjë me Prokurorinë Speciale Antikorrupsion.
“Mora mbështetje të pakufizuar për reformën në drejtësi. Në grup dhashë sqarime për ligjet që do kalojnë të enjten në Kuvend. Grupi i PS pyetje legjitime e me shqetësimin që të zbatohet sa më shpejt. Pas miratimit në Kuvend nis puna për ngritjen e institucioneve të reja. Paketa tjetër e ligjeve pothuajse ka përfunduar”, tha Xhafaj në përfundim të mbledhjes së grupit parlamentar të Partisë Socialiste.
