Partia Demokratike deklaron se ka prova për zjarrin që pretendon se ka përfshirë zyrën e prokurimeve në Ministrinë e Shëndetësisë. Ky reagim vjen pas deklaratës së ministres Manastirliu e cila e mohoi një fakt të tillë.
Sekretari i përgjithshëm i PD, Gazment Bardhi ka shkruar në faqen e tij në Facebook, se ministrja gënjen. Ky fakt sipastij e bën atë pjesë të hetimit që duhet të ndërmarrë SPAK edhe për manipulim dokumentash. Më tej Bardhi përmend se ministrja duhet të shkojë në burg për këtë çështje.
“Fronti i vjedhjes me tendera sekret vazhdon avazin e gënjeshtrës! Asgjë e re nga bashkëpunëtorja e Edi Ramës në vjedhje dhe në fshehjen e vjedhjes së parave të shqiptarëve me tendera sekret në kohë pandemie.
Ogerta Manastirliu gënjen paturpësisht për zjarrin e rënë në Ministrinë e Shëndetësisë. Ne kemi prova për këtë skandal dhe do t’i bëjmë publike nesër.
Fakti që Ministrja gënjen për zjarrin duhet të bëhet pjesë e hetimit jo vetëm për vjedhjen, por edhe manipulimin e dokumentave përmes djegies. Ajo gabon rëndë që mendon se duke i zhdukur provat do të shpëtojë nga burgu.
Ogerta Manastirliu boll nxorre tym nga koka dhe gënjeshtra nga goja. E kuptojmë që ky skandal të djeg shumë. Ky është zjarr që të çon në burg dhe nuk e shuan dot me ujë!”, shkruan sekretari i përgjithshëm i PD. /Opinion.al
