Nuk ishte në gjendjen e tij më të mirë. Saimir Tahiri, në një deklaratë për gazetarët, pasi u vendos që dosja e tij të kalojë për gjykim dha mesazhe të koduara. Si një nga deputetët që votoi reformën në drejtësi, ai tha se kjo nuk është drejtësia për të cilën ai kontribuoi.
“Ky nuk është sistemi i drejtësisë për të cilin unë luftova, por do të ndjek të gjitha etapat për të kërkuar drejtësi dhe për të fituar pafajësinë time”, theksoi Tahiri.
Ai u shpreh i keqardhur për të gjithë shqiptarët, që sipas tij, duhet të përballen me këtë drejtësi, që vuajnë prej saj dhe që nuk kanë mundësi të ngrenë zërin e tyre. Por, veten nuk e konsideroi një “hero të heshtur”.
“Sot e tutje do të flas në gjykatë dhe për publikun, sepse ky nuk mund të jetë më një proces i mbyllur. Ky proces i ka kapërcyer kufijtë e një maskarade , është i gjithi një absurditet”, deklaroi Tahiri, duke shtuar se sipas tij, drejtësia i ka shumë borxhe njerëzve.
Po ashtu Ish-ministri i Brendhëm foli dhe për “prova të trafikuara”./Opinion.al
