Në Gjykatën e Tiranës kanë nisur të jepen vendimet e para për të arrestuarit e protestës së të enjtes, zhvilluar nga banorët e zonës së Astirit. Një prej tyre, Lulzim Dozhani, është ndaluar së bashku me bashkëshorten. Në fjalën e tij përpara trupit gjykues, Dozhani ka kërkuar që njëri prej kryefamiljarëve të lihet i lirë, për t’u kujdesur për djalin 7-vjeçar.
“Jam arrestuar me gjithë gruan time. Nuk shkoja dot të merrja djalin 7 vjeç nga shkolla. Ne na kanë çuar në komisariat. Na lini njërin të shkojmë ta marrim fëmijën siç presin të gjithë fëmijët e tjerë në shkollë. Nuk na kanë dhënë asnjë të drejtë të kontaktojmë me njerëzit për ta marrë këtë fëmijë. Ka shkuar në shtëpi dhe e ka gjetur derën mbyllur, ka pasur frikë e ftohtë. Ka shkuar dhe është ushqyer tek komshinjtë. Ne jemi në komisariate dhe nëpër burgje”.
Lulzim Dozhani tha se është tërhequr zvarrë nga policia dhe se nuk i kanë lejuar të komunikojë me të afërmit e tij. Gjykata vendosi për të, masën men detyrim paraqitje.
