Mbrëmjen e sotme, artistë, aktorë dhe aktivistë të shoqërisë civile nisën protestën përballë godinës së Teatrit Kombëtar në kryeqytet.
Protestuesit kërkuan mos shembjen e teatrit ashtu siç parashikon projektligj i propozuar nga qeveria “Rama”.
Pr/ligji parashikon shembjen e teatrit dhe ngritjen e disa kullave.
Protestuesit kërkuan mbrojtjen e ndërtesës së Teatrit dhe mosmiratimin e ligjit që i hap rrugë ndërtimit me PPP të teatrit dhe të kullave përreth tij.
Protestuesit e quajtën projektligjin që parashikon dhënien e tokës publike ku ndodhet teatri një kompanie private, një skemë të pastër klienteliste antikushtetuese.
Gjatë fjalës së tij, aktori i njohur Alfred Trebicka i bëri thirrje edhe një herë qeverisë që të mos preket Teatri, ndërsa thirrja ka qenë edhe për qytetarët për të mos ndalur së protestuari deri sa të anulohet ky projektligj.
“Robert De Niro i tha f*ck you Donald Trump, dhe ne duhet ti themi këtij tonit f*ck you”,tha Trebicka.
Edmond Budina u shpreh se do të “ngujohen në teatër dhe se nuk largohen nëse qeveria nuk tërhiqet nga shembja”.
“Të premten në orën 19:00 të mblidhemi dhe ti kërkojmë qeverisë të tërhiqet nga drafti”, apeloi ai.
