Prsidenti i Bjellorusisë Alexander Lukashenko, tha të hënën se ai do të jetë i gatshëm të zhvillojë zgjedhje të reja dhe ta dorëzojë pushtetin pas zhvillimit të një referendumi për ndryshime në kushtetutë.
Kjo deklaratë e tij vjen pas një jave të nxehtë në kryeqytetin Minsk, ku mijëra protestues po kundërshtojnë rezultatin e zgjedhjeve të një jave më parë, që shpallën fitues me më shumë se 80% të votave presidentin aktual Lukashenko.
Gjatë fjalimit të tij para punëtorëve të një fabrike shtetërore, Lukshenko u ndërpre disa herë nga thirrjet për t’u larguar nga pushteti që mban prej 26 vitesh.
“Ne i kemi zhvilluar zgjedhjet. Vetëm kur të më vrisni, do të ketë zgjedhje të reja”, u shpreh ai ndërsa propozoi të ndryshojë kushtetutën.
“Ndryshimet do t’i miratojmë me një referendum dhe unë do t’i dorëzoj fuqitë e mia kushtetuese. Por jo për shkak të presionit në rrugë. Nuk jam shenjtor. E njoh anën time të ashpër. Nuk jam i përjetshëm. Por nëse largoni me forcë presidentin e parë, kështu do të bëni edhe me vendet fqinje e të tjerë”, tha ai duke deklaruar se në vend mund të zhvillohen zgjedhje parlamentare e presidenciale pas referendumit, nëse kjo do të jetë ajo që popullsia dëshiron.
Ndërkohë drejtuesja e opozitës Tsikhanouskaya pas nisjes së protestave u largua nga vendi drejt Lituanisë./Opinion.al
