Rreth 111 persona janë arrestuar në protestën kundër reformës së pensioneve në Francë.
Punonjësit e disa sektorëve kanë vazhduar grevën kundër reformës së pensioneve të qeverisë në gjithë vendin, duke shënuar ditën e 11-të të protestave në vend.
Protestat kanë degraduar në përleshje me policinë gjatë një marshimi të madh, të udhëhequr nga sindikatat në Paris. Protestuesit i kanë vënë zjarrin lokalit të mirënjohur La Rotonde, ku Macron zhvilloi festën e tij gjatë zgjedhjeve në 2017. Ndërkohë më herët, dhjetëra punëtorë hekurudhor të pajisur me pankarta pushtuan përkohësisht një pjesë të një rruge kryesore në qytet.
Të paktën 111 persona u arrestuan në mbarë vendin, ndërsa më shumë se 100 policë u plagosën, disa në gjendje të rëndë, sipas ministrisë së brendshme.Policia bën me dije se rreth 570,000 protestues morën pjesë në marshime ditën e enjte.
Sindikatat kanë kërkuar të vazhdojnë presionin me këtë ditë të 11-të të grevës që kur qeveria zbuloi planin e saj në janar për të rritur moshën e pensionit nga 62 në 64. Protestat kanë vazhduar që kur qeveria zgjodhi të anashkalojë një votim parlamentar për të shtyrë ligjin, duke intensifikuar zemërimin mes kundërshtarëve të projektligjit.
Një ditë përpara se Gjykata Kushtetuese pritet të shqyrtojë ligjin e pensioneve, sindikatat kanë paralajmëruar për një ditë të re greve që mund të mbahet më 13 prill.
Përveç rritjes së moshës minimale në 64 vjeç, reformat do të kërkojnë që njerëzit të punojnë për 43 vjet për të marrë një pension të plotë, gjë që sindikatat argumentojnë se është shumë e ashpër veçanërisht për ata me punë të vështira fizike./Opinion.al
