Deputetja e Partisë Socialiste, Eglantina Gjermeni ka folur në lidhje me protestat qe kanë përfshirë vendin pas vrasjes së 25-vjeçari Klodian Rasha nga një efektiv policie pak ditë më parë.
Në një intervistë për “A2”, deputetja shprehet se zemërimi i qytetarëve është normal për ngjarjen e rëndë, por nuk duhet të kalojë në akte dhune.
Gjermeni thotë se përdorimi i të miturve, janë akte që krijojnë ndjesi pasigurie dhe keqardhje. Por, në protesta nuk janë parë akte dhune vetëm nga protestuesit, por dhe nga ana e punonjësve të policisë.
Lidhur me këtë fakt, ajo thekson se duhet reflektim sa i përket përzgjedhjes së punonjësve të policisë.
“Kjo që ka ndodhur është një tragjedi, shumë e rëndë, nuk duhet të kishte ndodhur. E gjithë shoqëria është e tronditur, pas vrasjes së 25-vjeçarit krejtësisht të pafajshëm. Rrethanat janë ende të paqarta, ndërsa prokuroria po bën hetimin. Dhimbja, trishtimi, zemërimi, janë normale. Reagimi qytetar është normal. Të gjithë duhet të reflektojmë se çfarë duhet të bëjmë ndryshe dhe më mirë. Reagimi qytetar duhet të jetë për çfarëdolloj ngjarje. Shoqëria shqiptare do të bëhet më e mirë nëse ka reagim qytetar, si protesta për armët kimike, protesta e studentëve. Sa i përket dhunës në këtë protestë dhe përdorimi i të miturve, janë akte që krijojnë ndjesi pasigurie dhe keqardhje. Mendoj se duhet reflektim sa i përket përzgjedhjes së punonjësve të policisë, sa i përket rritjes së profesionalizimit të tyre. Nga ana tjetër edhe qytetarët shqiptarë meritojnë një polici më të mirë, por këta policë janë edhe heronjtë tanë”,-tha Gjermeni./ Opinion.al
