10 persona janë proceduar pasi protestuan ditën e djeshme në Korçë. Sipas Tv Klan.al mes të proceduarve është edhe deputeti demokrat dhe anëtari i Komisionit të Rithemelimit, Edmond Spaho.
“Këta shtetas ditën e djeshme, janë organizuar dhe kanë zhvilluar një protestë në hyrje të qytetit të Korçës, e cila më pas ka kaluar edhe në zona të tjera të qytetit, ku kanë penguar qarkullimin e automjeteve dhe gjatë thirrjes së policisë për zhbllokimin e rrugës, këta shtetas kanë kundërshtuar dhe nuk i janë bindur urdhrit të punonjësve të policisë”, thuhet në njoftimin e policisë së Korçës.
Një tjetër qytet, ku ditën e djeshme u zhvilluan protesta ka qenë dhe Lushnja. Policia ka njoftuar mëngjesin e sotëm se në Lushnje janë proceduar 13 persona, pasi “ditën e djeshme në vendin e quajtur “Pushimi i shoferit”, kanë bërë bllokimin e aksit rrugor Fier-Lushnjë, duke mos lejuar qarkullimin e mjeteve nga të dy senset e lëvizjes”.
Prej tre ditësh i gjithë vendi është përfshirë nga protesta. Qytetarët protestojnë për rritjen e çmimit të naftës dhe të ushqimeve./Opinion.al
