Pas protestës së opozitës, përmes një statusi në Twitter ka reaguar edhe kryetari i Bashkisë së Tiranës, Erion Veliaj. “Po pse o, pse? Ça ju bëri pema, lulja, bulevardi, arti, pastërtia, e bukura, e mira? Do t’i rikuperojmë në kohë rekord, por Tirana nuk harron – s’ka më kthim pas tek huri e druri! Mirënjohje kryeqytetit që u distancua nga ekskursioni i dhunës! #MosVandalizoTiranën “, shkroi Veliaj në rrjetin social.
Protesta e opozitës është mbyllur pas më shumë se katër orësh përplasjesh dhe tensionesh të forta, para godinës së Kryeministrisë. Përfundimin e saj e njoftoi në shesh, kryetari demokrat Lulzim Basha, ndërsa deklaroi se “kjo revoltë do të vijojë deri në përmbysjen e këtij sistemi të kalbur”. Ditën e enjte mbështetësit e opozitës janë thirrur në një tjetër protestë.
