Në fjalën hapse të protestës së thirrur nga Aleanca për Teatrin, regjisori Robert Budina i kërkoi institucioneve, në veçanti SPAK, që të hetojë shembjen e godinës së teatrit.
Ai tha se policia sulmoi dhunshëm aktivistët dhe se prishja e godinës kishte nisur teksa artistët ishin ende breda.
“Në 04:15, një pjesë e artistëve, aktivistëve, qytetarëve, pjesëtarëve të opozitës u sulmuam nga policia me një aksion blic të paimagjinueshëm. Një pjesë e jona u futëm brenda godinës dhe policia na sulmoi me një urrejtje të paimagjinueshme. Ndërkohë që ne ndodheshim brenda godinës, nisi shembja e godinës duke rrezikuar jetët tona dhe të atyre efektivëve të policisë që kishin ardhur për të na larguar.
Në rrënojat e teatrit janë kostume, mjetet tona personale dhe ato janë zhdukur të gjitha. Qëllimi i protestës sonë është një: ftojmë prokurorinë, qeverinë kryeministrin, ministrin e Brendshëm, opozitën, prokurorët e SPAK-ut të hetojnë këtë ngjarje, që ishte tentativë për vrasje e artistëve që ndodheshin brenda godinës. Kemi kontaktuar edhe me faktorin ndërkombëtar për t’i bërë të qartë çfarë ka ndodhur. Kemi marrë mbështetje dhe do të donim që kjo ngjarje të zbardhej sepse godina e teatrit nxori në pah të gjitha problemet e demokracisë shqiptare”, tha Budina.
Nën moton “Ne jemi teatri” Aleanca për Mbrojtjen e Teatrit ka thirrur sot një protestë kundër shembjes së godinës dhe kundër qeverisë.
Protesta ishte parashikuar të niste në orë 16:30. Protestuesit e parë janë mbledhur në Bulevardin Zogu i Parë, në zonën pranë hyrjes së pedonales.
Në orët e para të mëngjesit të së dielës, policia ndërhyri tek Teatri duke shpërndarë aktivistët për ti hapur më pas rrugë shembjes së godinës. Kjo solli një përplasje mes aktivistëve, shoqërisë civile dhe anëtarëve të opozitës me forcat e policisë. Disa episode dhune u shënuan dhe dhjetëra persona u shoqëruan.
Aleanca për Mbrojtjen e Teatrit e quajti shembjen e godinës si vendosjen e diktaturës në vend. Qëndrimi i tyre u mbështet edhe nga opozita. Ende nuk dihet se çfarë parashikohet të ndodhë në protestën e sotme. Zyra e BE në Tiranë ka bërë thirrje për vetpërmbajtje ndërkohë që vendi është në gjendjen e fatkeqësisë natyrore e cila ndalon mbajtjen e tubimeve. /Opinionn.al
