Autoritetet ruse kanë arrestuar liderin e partisë kryesore opozitare, Alexei Navalny, gjatë një proteste të zhvilluar në Moskë dhe që kishte si kauzë luftën kundër korrupsionit. Mijëra qytetarë i janë bashkuar tubimeve të shumta që janë organizuar në të gjithë vendin për shkak të akuzave që kanë nisur të hidhen në drejtim të Kryeministrit rus, Dimitri Medvedev.
Navalny u vu në pranga si organizator i protestës. Ai u dallua nga forcat e sigurisë të cilat vepruan në mënyrë të menjëhershme, pavarësisht kundërshtive dhe përpjekjeve të qytetarëve të shumtë, për të mos lejuar arrestimin e liderit opozitar.
Pak orë pas arrestimit, Navalny qetësoi simpatizantët e partisë së tij nëpërmjet një postimi në rrjetin social twitter ky shkroi: “Përshëndetje të gjithëve, jam mirë. Nuk ka nevojë për luftë që të më nxirrni nga këtu. Do të vijojmë protestat tonë paqësore, në luftën kundër korrupsionit”.
Megjithatë, lideri i opozitës nuk ishte protestuesi i vetëm që u arrestua. Bashkë me të, raportohet të jenë vënë në pranga të paktën 130 persona. Në disa zona ku u zhvilluan demonstrata ka pasur përplasje mes qytetarëve dhe policisë. Protestuesit kanë qëlluar me gurë dhe sende të forta në drejtim të forcave të rendit, të cilat nga ana tjetër janë kundërpërgjigjur me gaz-lotsjellës për të shpërndarë turmat.
Demonstratat në Rusi filluan pasi lideri opozitar, Alexei Navalny, publikoi një sërë të dhënash në lidhje me pasuritë që sipas tij fsheh Kryeministri i vendit, Dimitri Medvedev. Protesta ka pasur jo vetëm në Moskë, por edhe në qytete të tjera përfshirë Shën Petërsburgun, Vladivostokun, etj. Deri më tani, Medvedev, nuk ka pranuar që të komentojë në lidhje me akuzat që kanë lëshuar ndaj tij opozitarët.
