Në protestën që opozita do të mbajë paraditen e kësaj të shtune kanë nisur edhe pankartat e para.
Pasi nëpër makina ishin vendosur “po vijmë Pasha” në Sheshin Skënderbej është shfaqur statuja e Drejtësisë me portretin e Edi Ramës, që simbolizon kapjen politike të drejtësisë për t’i shërbyer krimit dhe korrupsionit.
Statujën e Drejtësisë 3 metra të lartë e mbajnë 10 të rinj të maskuar si Edi Rama, Fatmir Xhafaj, Saimir Tahiri, Agron Xhafaj, Moisiu Habilaj për të treguar se Drejtësia është vënë në shërbim të trafikut të drogës, krimit të organizuar dhe qeverisë së lidhur me të.
Një simbol tjetër i shpërfytyrimit të Drejtësisë nga pushteti është portreti i Ramës që ka zëvendësuar sytë e mbyllur të Drejtësisë së barabartë për të gjithë me syrin që ai i shkel krimit për ta favorizuar dhe mbrojtur atë.
Peshorja e drejtësisë, që duhet të ishte e barabartë, peshon nga mbrojtja e Saimir Tahirit, Fatmir Xhafajt dhe parave të tyre të drogës, ndërsa Kushtetuta, që mbron të drejtat e qytetarëve të zakonshëm, është zhvlerësuar nga drejtësia politike e Edi Ramës.
Shpjegimi i simbolit
“Zonja e Drejtësisë me sy të lidhur duke mbajtur një peshore, tregon se të gjithë janë të barabartë përpara ligjit dhe se të bërit drejtësi do të thotë të vendosësh në peshore interesat e kundërt. Në sistemin penal kjo do të thotë të balancosh, nga njëra anë detyrimin dhe interesin e shtetit për t’i vënë kriminelët përpara drejtësisë dhe nga ana tjetër të drejtën e një individi për tu respektuar, duke pasur parasysh dinjitetin e tij njerëzor. Për më tepër, kur një person akuzohet se ka kryer një vepër penale, ai përballet me të gjithë makinizmat shtetërore. Me qëllim që të garantohet barazia para gjykatës nevojiten disa masa mbrojtëse.”
