Ashtu siç kishin paralajmëruar, banorët e lagjes Shkozë në Tiranë, të cilët preken nga prishja e 150 banesave, kanë filluar marshimin e tyre drejt Ambasadës Amerikane, ku do të kërkojnë që çështja e tyre të mediatizohet edhe më tej me qëllim që çështja e banesave të tyre të marrë një zgjidhje të pëlqyeshme për të gjitha palët. Banorët që preken nga projekti i rehabilitimit të Lanës në këtë pjesë të Tiranës, do të përpiqen të dorëzojnë në Ambasadën Amerikane një letër ku do të shprehin të gjithë shqetësimin e tyre për atë çfarë po ndodh me banesat e tyre. Këta banorë nuk pranojnë të trajtohen me bonuse qeraje apo me kredi të butë, ndërkohë që shprehen se edhe pse kanë kërkuar të legalizohen prej shumë vitesh, shteti nuk u ka mundësuar që të jenë të ligjshëm. Ndërkohë që janë njoftuar për projektin vetëm pak kohë më parë. Po kështu këta banorë krahas Ambasadës Amerikane do ti drejtohen me një letër edhe Ambasadës së Bashkimit Evropian në Tiranë.
