Ministri i Brendshem Fatmir Xhafaj deklaron se janë lënduar 12 punonjës të FNSH-së nga gurët dhe sendet e forta të hedhura nga këta individë, ndërsa një punonjës policie është plagosur më rëndë dhe po merr ndihmën e nevojshme mjekësore në spital.
Burime nga Policia thanë se nga përplasja ka mbetur i plagosur edhe vetë Drejtori i Policisë së Kukësit, Perlat Vatoci. Edhe pse i lënduar ai nuk ka pranuar të largohet deri në përfundim të protestës.
Burime mediatike flasin për 14 efektivë të FNSH-së të lënduar
Cfarë ndodhi?
Prej orës 10:40 qindra protestues u mblodhën tek Rruga e Kombit për të kërkuar heqjen e tarifës së kalimit.
Fillimisht protestuesit u përplasën me policinë e cila u përpoq të mbronte sportelet. Me skafandra në duar dhe me shkopinj gome ata u perpoqën t’i ndalonin për ti afruar tek trau. Pati përplasje me protestuesit të cilët qëllonin me gurë.
Por më pas policia u zbraps dhe protestuesit i vunë flakën kabinave dhe disa objekteve qe ishin pjesë e struktures metalike ku makinat ndalojnë për të bërë pagesën e tarifës së kalimit.
