Pak ditë pas vdekjes së 27-vjeçarit Enea Ftoj në paraburgimin e Komisariatit të Korçës, gjatë ditës së sotme është zhvilluar protestë para Ministrisë së Brendshme në Tiranë.
Protestuesit kërkojnë të thirret në interpelancë ministri i Brendshëm, Fatmir Xhafaj për të dhënë sqarime për rrethanat e vdekjes së babait të tre fëmijëve. Familjarët kërkojnë drejtësi dhe hedhin akuza në drejtim të policisë, pasi sipas tyre Enea Ftoj është dhunuar.
“Në video duket që është i dhunuar. Kishte brinjët e shpatullën e thyer dhe kishte tre gjilpëra në qafë. Në polici thanë që është vdekje natyrale. Kërkojmë drejtësi për djalin tonë”-ka thënë vëllai i 27-vjecarit.
Kujtojmë se ngjarja ndodhi në datë 17 të këtij muaji, ndërsa Enea Ftoj ishte ndaluar nga policia pasi akuzohej për vjedhje./BW
