“Çdo banor i zonës së Kukësit, si përdorues i shpeshtë i Rrugës së Kombit, do të mund të përfitojë nga sistemi i aboneve dhe njëkohësisht të kontribuojë për mirëmbajtjen e rrugës dimër-verë, si edhe investimet mbrojtëse e plotësuese të saj”. Kështu deklaroi sot ministri i Infrastrukturës dhe Energjisë, Damian Gjiknuri i cili doli në një konference për mediat pas protestës që çoi në shkatërrimin e sistemit të tarfimimit në autostradë.
Më tej ai sqaroi se nuk njihen tarifat lokale dhe tarifat e distancuara. Megjithatë është marrë përsipër masa lehtësuese për frekuentuesit e shpeshtë. Përdoruesve të shpeshtë do u bëhet abone me kosto më të ulët. “Kemi nisur diskutimet për të gjetur një zgjidhje për një periudhë shumë të afërt që kjo do të jetë mundësia e mundshme”, sqaroi ministri.
Sipas tij, sot ne trashëgojmë mungesën totale të mirëmbajtjes së rrugëve në Shqipëri”. “Në vitin 2013 mirëmbajtja në tërësi e rrjetit rrugor shqiptar ishte 1.2 miliard lekë, duke mbuluar vetëm 18 për qind të nevojës, në vitin 2017 këtë fond e çuam në 3.2 miliard lekë, pra e kemi rritur gati 3 herë”, tha Gjiknuri. Që në vitin 2008, tha Gjiknuri, “qeveria shqiptare ka parashikuar përdorimin e tarifës rrugore për mirëmbajtjen e rrugëve”.
Ditën e shtunë (31 Mars) qytetarët e Kukësit u organizuan në një protestë të thirrur nga këshilli bashkiak. Protesta degjeneroi në përplasje me policinë dhe djegien e kabinave që kishte vendosur koncesionari për të mbledhur taksën e Rrugës. Banorët e Kukësit janë shprehur se nuk kanë mundësi të paguajnë 10 euro sa here kalojnë në autostradë, për më teper që nuk ka rrugë alternative për aksin Tiranë-Kukës. Ndërkohë prej asaj dite situata ka percipituar. Janë 23 persona të arrestuar dhe disa të tjerë të shpallur në kërkim për shkatërrim prone. Sakaq, opozita është rreshtuar në krah të këtyre banoreve duke protestuar për lirimin e të arrestuarve dhe heqjen e taksës.
/Opinion.al
