Kreu i PD, Sali Berisha ka deklaruar ditën e sotme se do të zhvillojë një protestë më datën 16 maj në orën 17:00.
Po në këtë ditë, Tirana do të presë Samitin e Komunitetit Politik Europian.
Bazuar në këtë lajm, Berisha tha se miqtë që vijnë duhet të dëgjojnë zërin e një populli që kërkon të votojë i lirë.
Po ashtu ai ka krahasuar Shqipërinë me Korenë e Veriut, teksa thotë se nuk ka gjë më të turpshme të shikosh kutitë e votimit me 99.6% vota për PS-në nga diaspora.
“Tani, siç e shifni dhe po e ndiqni dhe unë përgëzoj mediat për raportet që kanë bërë, disa prej tyre shumë të çmuara dhe të guximshme, ne nuk bëhet fjalë kurrë që të pajtohemi me këto zgjedhje. Jo, të harrojë kush.
Ne kemi bërë gjithçka në përputhje me ligjin, për sa na takon ne si opozitë, që Shqipëria të ketë zgjedhje. Tani opozita ka detyrat që do t’i përmbushë me shumë dinjitet, me shumë vendosmëri.
Protesta e datës 16 është një protestë në emër të një populli që votën ja dikton revolja pas koke, siç ka ndodhur në Peshkopi.
Që votën ja dikton Poja, Suel Çela, Blendi Xhabafti, ja diktojnë bandat në të 4-anët e vendit.
Miqtë që vijnë duhet të dëgjojnë zërin e një populli që kërkon të votojë i lirë dhe që një tiran, një narkodiktator, nuk i lejon ata, por i përdor të gjitha mjetet e dhunshme për tu rrëmbyer votën.
Ka krijuar shtetin monstër elektoral, para jush, para gjithë botës, për të shtypur e vullnetin e qytetarëve. Ky është fillimi i një beteje e cila nuk ndalet më.
Edhe njëherë, dora dorës do të formulohet e gjithë strategjia, por zgjedhje të cilat blihen në mënyrë të tillë, nuk ka parë toka. Të çosh zarfin me 100 euro, të flasësh 2 ditë para zgjedhjeve 200 milionë euro gjoba, të japësh licenca për mbjelljen e miliona rrënjëve kanabis për votë, të aktivizosh bandat, siç është evidentuar në qytetet, që bën thirrje për konflikt dhe destabilizim, por lufta jonë është për votë. Ne nuk mund të na imponojnë kush, kurrë në këtë mënyrë.
Jemi forcë politike sovrane. A ka gjë më të turpshme, shikoni kutitë si në Korenë e Veriut, 99.6% vota për PS-në nga diaspora. A mundet të pranohen këto. Për të mos u thënë se ne po dokumentojnë gjithçka.
E mbyll duke shprehur mirënjohje të pakufishme për të gjithë ata që kanë votuar, dhe ftoj që t’i dalim zot votës së lirë”, shprehet Berisha.
